२०७८ सालको नयाँ वर्ष सुरु

साझा नेटवर्क , बैशाख १ ,काठमाण्डौ -आजबाट विक्रम संवत् २०७८ सालको नयाँ वर्ष सुरु भएको छ ।
वैशाख १ गते नयाँ वर्षको पहिलो दिन नेपालीहरुले एकापसमा शुभकामना आदानप्रदान गरी हर्षोल्लासका साथ मनाइरहेका छन् ।
आजका दिन योजना बनाउने र कुनै काममा सफलता पाउनका लागि सङ्कल्प गर्ने चलन समेत रहेको छ ।

गत वर्ष गरेका कामको सफलता÷असफलता मूल्यांकन गरी असफलता दोहोरिन नदिने र सफलता प्राप्त गर्न योजना निर्माण एवं संकल्प
गर्ने दिनको रुपमा पनि नयाँ वर्षलाई लिने गरिन्छ ।
कलियुग शुरु भएको तीन हजार ४४ वर्षपछि विक्रम संवत् शुरु भएको हो ।

कोरोना भाइरसको सङ्क्रमणका कारण गएको वर्ष जस्तै यसपालि पनि सरकारले घरभित्रै नयाँ वर्ष मनाउन आग्रह गरेको छ ।

आज बिहानै स्नान गर्ने, घर, कोठा–आँगन सफा गर्ने, तथा आफन्त, परिवार र साथीभाइसँग भेटघाट गर्दै मिसठान्न भोजन बनाएर खाने चलन छ ।
नयाँ वर्षका अवसरमा आज सार्वजनिक बिदा दिइएको छ ।