धुर्कोट गाउँपालिकाद्धारा अति बिपन्नलाई राहत वितरण सुरु

टोपलाल अर्याल,गुल्मी चैत १८ ।

कोरोना संक्रमणको कारण नेपाल सरकारले लक डाउन गरेपछि कैयन बिपन्न परिवारमा खाद्यान्न संकट देखिएको छ । सोहि अवस्थालाई मध्येनजर गरेर जिल्लाको धुर्कोट गाउँपालिकाले अति विपन्न परिवारलाई राहत वितरण गरेको सुरु गरेको छ ।मंगलबार गाउँपालिका अध्यक्ष भुपाल पाखरेल र उपाध्यक्ष शिव बहादुर खत्रीले वडा नं ७ का ६० अति विपन्न परिवारका लागि आवश्यक पर्ने दैनिक उपभोग्य खाद्य सामग्री वितरण गरेका छन् । प्रति परिवार २५ केजी चामल, पाँच केजी आलु, एक पोका तेल, एक केजी नुन लगायतका खाद्यान्न वितरण गरेको वडाध्यक्ष हिमप्रसाद पन्थीले बताए । दैनिक काम गरेर पाखुरीकै भरमा गर्जो टारेका परिवार लक डाउनपछि खाद्य संकटको चपेटामा थिए । सरकारले लक डाउनको अवधि बढाएपछि गाउँपालिकाले त्यस्ता परिवारको लगत संकलन गरेर खाद्यान्य वितरण गरेको प्रमुख प्रशासकीय अधिकृत काशीराम पन्थीले बताए ।

त्यस्तै बुधबार वडा नं ५ वस्तुका ४० र वडा नं ६ का ५२ अति विपन्न परिवारलाई राहत वितरण गरिने पन्थीले बताए । राहत वितरण गर्दै अध्यक्ष पोखरेलले कोरोना भाइरसको प्रभावले आफ्नो दैनिकी चलाउन मुस्किल परेका अपाङ्ग, एकल महिला तथा आयस्रोत केही नभएका अति विपन्न परिवारलाई पहिलो चरणमा राहत वितरण गरिएको बताए । उनले गाउँपालिकाले विपन्न परिवारको वर्ग पहिचान गरेको गरिरहेको बताउँदै प्रत्येक वडामा पहिलो चरणमा अति विपन्न र दोस्रो चरणमा अन्य विपन्नलाई राहात वितरण गर्ने जानकारी गराए ।त्यस्तै उपाध्यक्ष शिव बहादुर खत्रीले गाउँपालिकाले विपद् व्यवस्थापन तथा राहात कोष स्थापना गरेर नगद तथा खाद्यान्य संकलन गरिरहेकाले बिपन्न परिवारको दुखमा सवैलाई साथ दिन आग्रह गरे । उनले कोषमा गाउँपालिकाका सवै जनप्रतिनिधी, कर्मचारी र शिक्षकहरुले पारिश्रमीकको केहि अंश जम्मा गर्नुका साथै अन्य केहि मनकारीहरुले सहयोग गरेको जानकारी दिए । अहिलेसम्म राहत कोषमा पाँच लाख भन्दावढी रकम तथा खाद्यान्न सामाग्री समेत संकलन भइसकेको छ ।