एन्डी मुर्रे विम्बल्डन टेनिसको दोस्रो चरणमा

एजेन्सी, लण्डन ।
बेलायती नम्बर एक खेलाडी एण्डी मुर्रे विम्बल्डन टेनिसको दोस्रो चरणमा प्रवेश गरेका छन् । मंगलबार राती आफ्नै देशका लियाम ब्रोडीलाई पराजित गर्दै मुर्रे वर्षको तेस्रो ग्रान्ड स्लाम टेनिस प्रतियोगिता विम्बल्डनको दोस्रो चरणमा पुगेका हुन् ।

बेलायतको विम्बल्डनमा जारी प्रतियोगितामा दोस्रो बरियताका मुर्रेले पहिलो चरणको खेलमा ब्रोडीलाई ६– २, ६–३ र ६–४ को सोझो सेटमा पराजित गरे । मुर्रेले अब दोस्रो चरणमा मरेले चाईनिज ताईपेईका यन सेन लुसँग खेल्नेछन् । विम्बल्डन टेनिस घाँसे कोर्टमा सञ्चालन हुने वर्षको एकमात्र ग्रान्ड स्लाम टेनिस प्रतियोगिता हो ।

मंगलबार राती भएको विम्बल्डन अन्तर्गत नै अन्य खेलमा जित निकाल्दै स्विट्जरल्याण्डका स्टानिस्लास वावरीङ्का, स्पेनका रामोस भिलानोस र फेलीसीयानो लोपेज, फ्रान्समा रिचार्ड ग्यास्के र जो विल्फ्रेड सोङ्गा पनि दोस्रो चरणमा प्रवेश गरेका छन् ।

यस्तै महिलातर्फ अमेरीकाकी विश्व नम्बर सेरेना विलियम्स र रुसकी स्वेतलाना कुज्नेत्सोभा पनि दोस्रो चरणमा पुगेका छन् । सेरेनाले स्विजरल्याण्डका अम्रा सडीकोभिकलाई ६ – २ र ६– ४ को सेटमा पाखा लगाउदै दोस्रो चरण पुगेकी हुन् । यस्तै कुज्नेत्सोभाले डेनमार्क्कि कारोलिन वास्ज्नास्कीलाई ७ – ५ र ६ – ४ को सेटमा पराजित गरिन ।