अर्जेन्टिनाका स्टार खेलाडी मेसीको सन्यास घोषणा

न्युयोर्क एजेन्सी, आषाढ १३।
अर्जेन्टिनाका स्टार खेलाडी लियोनल मेसीले सोमबार बिहान भएको कोपा अमेरिकाको फाइनल खेलमा पेनाल्टी मिस गरेपछि अन्तर्राष्ट्रिय फुटबलबाट सन्न्यास लिने घोषणा गरेका छन् । सो घोषणासँगै विश्व फुटबल तरंगित भएको छ ।

सोमबार भएको फाइनल खेलमा चिलीले अर्जेट्रिनालाई टाई ब्रेकरमा ४–२ ले हराएपछि मेसी विचलित भएका थिए । अघिल्लो वर्ष पनि चिलीसँग पराजित हुर्दै अर्जेन्टिना उपविजेतामा सीमित भएको थियो ।सन्न्यास घोषणा गर्दै २९ वर्षीय मेसीले भने, ‘मेरा लागि राष्ट्रिय खेल जीवन समाप्त भएको छ । मैले आफूले गर्न सक्ने सबै गरें, तर च्याम्पियन नहुँदा पीडा भएको छ ।’

मेसीले स्पेनिस क्लब बार्सिलोनाका लागि आठ ला लिगा उपाधि र चार च्याम्पियन्स लिगको उपाधि दिलाएका छन् । तर, राष्ट्रिय टिमका रहेर उनले एक अन्तर्राष्ट्रिय उपाधि मात्र चुमेका छन् । जुन २००८ को ओलम्पिकमा उनको टिमले स्वर्ण पदक जितेको थियो । लगातार दोस्रो पटक कोपा अमेरिकाको फाइनलमा पराजित भएको मेसीको नेतृत्वमा रहेको अर्जेन्टिना ब्राजिलमा भएको २०१४ को विश्वकपको फाइनलमा जर्मनीसँग १–० ले पराजित भएको थियो ।

मेसीले पाँचपटक उत्कृष्ट खेलाडीको अवार्ड प्राप्त गरेका छन् । ‘मैले चारवटा फाइनलमा प्रयास गरें, तर सम्भव भएन,’ मेसीले भने । मेसीले अर्जेन्टिनाका लागि २००५ मा डेब्यु गरेका थिए । उनले अर्जेन्टिनाका लागि १ सय १३ म्याच खेलेका छन् । ‘मैले सर्वाधिक चाहेका चिज देशलाई उपाधि दिलाउनु थियो, तर त्यो हुन सकेन । त्यसैले मैले सोचें, अब सन्न्यास लिन्छु,’ उनले भने, ‘यो नै सबैका लागि सही समय हो । धेरै मानिस छन्, जसले यो घोषणा चाहेका छन् ।

उनले निर्णय लिन कठिन भएको तर आवश्यक रहेको बताएका छन् । मेसीले यस वर्षको कोपा अमेरिकामा ५ गोल गरे । उनले सेमिफाइनलमा अमेरिकाविरुद्ध सानदार फ्री–किक प्रहार गरेका थिए । सो गोल गरेपछि उनी देशका लागि सर्वाधिक गोल गर्ने खेलाडी बने । उनले अर्जेन्टिनाका लागि ५५ गोल गरे । यसअघि बाटिस्टुटाले अर्जेन्टिनाका लागि ५४ गोल गरेका थिए ।

अर्जेटिनाका गोलरक्षक सर्जियो रोमेरोले मेसीले पुनर्विचार गर्ने बताए । ‘पीडाको समयमा उनले सो कुरो बोलेका हुन् । किनकि, हाम्रो हातबाट सुन्दर अवसर गुमेको थियो । तर, म मेसीविनाको राष्ट्रिय टिमको कल्पना गर्न सक्दिनँ ।’ उनले अर्जेट्रिनाको ड्रेसिङ रूममा आफूले यस्तो अवस्थामा यसअघि कहिल्यै नदेखेको बताए ।