गुल्मी महोत्सवको फोहोरले राष्ट्रपति रनिङ शिल्डमा समस्या

हुमाकान्त पोखरेल , गुल्मी वैशाख ४ ।
गुल्मीको निर्वाचन क्षेत्र नम्बर २ को राष्ट्रपति रनिङ शिल्ड प्रतियोगिता सुरु भएको छ । सिद्धबाबा माध्यमिक विद्यालयको आयोजना तथा जिल्ला खेलकुद विकास समितिको सहयोगमा प्रतियोगिता सुरु भएको हो । खेलको पहिलो दिन छात्र/छात्रा दुवैको तिन सय र आठ सय मिटर दौड भएका छन् ।

त्यस्तै छात्र/छात्रा भलिबल, कराँते, भलिबल, रिले दौड लगायतका खेलहरु सम्पन्न  हुदैछन । सात गतेसम्म संचालन हुने खेलमा २२ विद्यालय सहभागि छन् । खेल तम्घासको चिदिचौरमा भइरहेको छ । तर भर्खर गुल्मी महोत्सव सम्पन्न भएकोले खेललाई महोत्सवको फोहोरले भने असर गरेको छ । महोत्सव सम्पन्न भएको आठ दिनसम्म पनि उद्योग बाणिज्य संघले त्यहाँ निस्केको फोहोरको उचित ब्यवस्थापन गर्न नसक्दा राष्ट्रपति रनिङ शिल्ड प्रभावित भएको हो ।

सर्केस, घुम्ने पिङ लगायतका विभिन्न स्टलहरुको सामाग्रीले चिदिचौरको आधाभन्दा बढी भाग ओगटेका छन् । भने विभिन्न प्लास्टिकजन्य फोहोरले पनि चिदिचौरको सुन्दरता पहिलेजस्तो छैन । यसले गर्दा खेलकुदका कार्यक्रम संचालन गर्न असर परेको सिद्धबाबा माध्यमिक विद्यालय अतिरिक्त क्रियाकलाप समिमिका सह–सचिव जिवन पोखरेलले बताए ।

बिहान सिद्धबाबा माध्यमिक विद्यालय, जिल्ला खेलकुद विकास समिति र नेपाल आर्मीको समूहले चिदिचौरको केहि भाग सफा गरी खेलकुदका कार्यक्रम संचालन गरेको उनले बताए । ‘महोत्सव सम्पन्न भएको आठदिनसम्म पनि फोहोर हट्न सकेको छैन ।’ पोखरेलले भने, ‘सदरमुकामकै खुल्ला चौरमा यस्तो फोहोर राख्नु कत्तिको सुहाउने विषय होला ?’ चिदिचौरको माथिपट्टिको केहि भाग सफा गरेर कार्यक्रम संचालन गरेपनि बाँकि भागमा फोहोर रहदाँ कार्यक्रम निकै प्रभावित भएको जिल्ला खेलकुद विकास समितिका कार्यालय प्रमुख दिपक केसीले बताए ।

मञ्चमा गर्नुपर्ने उद्घाटन समारोह विद्यालयका कुर्ची मागेर कुनापट्टि गरेको, रिले दौड, भलिबल लगायतका खेलकुदका कार्यक्रम संचालन गर्न महोत्सवको फोहोरले निकै अप्ठ्यारो पारेको उनको भनाई छ । गुल्मी उद्योग बाणिज्य संघका अध्यक्ष दुर्गाप्रसाद पाण्डेले चिदिचौरको फोहोर हटाउन संघ लागिपरेको जानकारी दिए ।

‘उद्योग बाणिज्य संघले महोत्सवका सामाग्री हटाउन सम्बन्धित स्टलवालाई भनिसकेको छ ।’ उनले भने, ‘अबको ४/५ दिनमा चिदिचौर सफा भइसक्छ ।’ बाणिज्य संघकै लागतमा दैनिक ६/७ जना कामदारले काम गरिरहेकोले अब छिट्टै चिदिचौर सफा हुने उनले बताए