प्युठानका ६१ जना पत्रकारले पाए सुचना विभागको प्रमाणपत्र

राधिका भुसाल,प्यूठान,मंसिर २१।
सञ्चार तथा सूचना प्रविधि मन्त्रालय अन्तरगत सूचना तथा प्रसारण विभागले घुम्ती शिविरको आयोजना गरि प्युठानका पत्रकारहरूलाई परिचय पत्र वितरण गरेको छ । नेपाल पत्रकार महासंघ प्युठानको सह-आयोजनामा नेपाल सरकार प्रेस प्रतिनिधि प्रमाणपत्र (रातोकार्ड) वितरण गरेको हो ।

सूचना तथा प्रशारण विभागका निर्देशक धुब्र कुमार पोख्रेल, शाखा अधिकृत रूपा वि.क, रमा निरौला, सुजन निरौला र खगेन्द्र कार्की सहितको सुचना विभागको टोलीले ६१ जना पत्रकारहरुलाई रातो कार्ड वितरण गरेको छ । शिविरमा कार्ड नविकरण,नयाँ प्रेस प्रतिनिधि कार्ड वितरण,संस्था परिवर्तन, सिफारिस लगायतका मिडियालाई सुचना विभागबाट दिइने सेवाहरू प्रदान गरेको निर्देशक धुब्र कुमार पोख्रेलले बताए ।

श्रमजीवी पत्रकारहरूलाई प्रेस प्रतिनिधि कार्ड लिन काठमाडौं जाँदा समय बढि लाग्ने र खर्चिलो पनि हुने हुँदा दुर्गम जिल्लाहरूमा घुम्ती शिविर मार्फत सेवा प्रदान गर्दै आएको उनले बताए । सूचना तथा प्रशारण विभागले देश भरका दुर्गम जिल्लाहरूमा शिविरको आयोजना गरि सेवा प्रदान गर्दै आएको निर्देशक पोख्रेलले जानकारी दिए । शिविर मंसिर २१ गते सम्म सञ्चालन हुने आयोजकले जनाएको छ । शिविरमा रोल्पा जिल्लाका पत्रकारले पनि सेवा लिएका थिए ।