प्रकाण्ड करोडौं चन्दा उठाएको स्वीकार गरे

काठमाडौं , साउन ३० ।
नेपाल विप्लव समूहका पार्टीका स्थायी समिति सदस्य तथा प्रवक्ता खड्क बहादुर बिश्वकर्मा  (प्रकाण्ड) ले चन्दा उठाएको स्वीकार गरेका छन् । प्रकाण्ड एक सातादेखि प्रहरी हिरासतमा छन् ।जिल्ला अदालत काठमाडौंले बुधबार मात्र उनलाई थप दुई दिन थुनामा राखेर अनुसन्धान गर्न अनुमति दिएको छ। प्रकाण्डलाई बन्दी प्रत्यक्षीकरण मुद्दामा भोलि सर्वोच्चमा उपस्थित गराउन महानगरीय प्रहरी परिसर काठमाडौंको तयारी छ ।सर्वोच्चले सोमबार बाटोको म्याद बाहेक ४८ घण्टाभित्र उपस्थित गराउन आदेश दिएको थियो । प्रहरीका स्रोतका अनुसार प्रकाण्डले चन्दा लिएको स्वीकार गरेका छन् ।अनुसन्धान अधिकारी समक्ष बयान दिने क्रममा उनले ‘आर्थिक, भौतिक र नैतिक हिसाबले हामीले सहयोग लिएका छौं’ भनेका छन् । ‘चन्दा नभइ, सहयोग लिएको’ उनको दाबी छ । ‘हाम्रो पार्टीको नीति नै यही हो’, प्रकाण्डले बयानमा भनेका छन् ।

विप्लव समूहका प्रवक्ता प्रकाण्ड हेटौंडाबाट काठमाडौं आउने क्रममा २३ साउनमा पक्राउ परेका थिए ।उनलाई काठमाडौं प्रहरीको हिरासतमा राखिए पनि अनुसन्धान भने विशेष ब्यूरो र केन्द्रीय अनुसन्धान ब्यूरो (सीआईबी) ले गरेको छ ।

७ करोड ५६ लाख चन्दा उठाएको रेकर्ड भेटियो

अनुसन्धानमा संलग्न अधिकारीका अनुसार प्रकाण्डले मात्रै ७ करोड ५६ लाख रुपैयाँ चन्दा उठाएको विवरणसहितको आयव्यय रेकर्ड विशेष ब्यूरोको टोलीले फेला पारेको छ । प्रकाण्ड पक्राउ परेपछि प्रहरीले कपनस्थित घरमा छापा मारेको थियो । त्यहाँ २०७३ साल चैतदेखि चन्द उठाएको विवरण बरामद भएको स्रोतको दाबी छ ।

स्रोतका अनुसार उनको घरमा बरामद गरिएको व्यय विवरणमा विभिन्न क्षेत्रमा रहेको व्यक्तिहरुलाई दिइएको रकमको बारेमा उल्लेख गरिएको छ । प्रतिष्ठित उद्योगपतिदेखि व्यपारीहरुबाट विप्लव समूहले ठूलो रकम चन्दा उठाइरहेको सूचना गृह मन्त्रालयसम्म पुगेपछि समूहमाथि सुरक्षा निकायले निगरानी बढाएको थियो ।

प्रकाण्डको कसुर प्रमाणित भए चन्दा ऐन २०३० अनुसार २ वर्ष कैद वा संकलित रकम जफत वा दुवै सजाय हुनसक्छ ।

बिहीबार सर्वोच्चमा उपस्थित गराइने

विप्लव समूहका प्रवक्ता प्रकाण्डलाई बिहीबार बिहान सर्वोच्च अदालतमा उपस्थित गराउने प्रहरीको तयारी छ । प्रकाण्डलाई गैरकानुनी रुपमा थुनामा राखिएको भन्दै छोरा नरेन्द्रबहादुरले बन्दी प्रत्यक्षीकरणको रिट हालेका थिए ।

त्यसमाथि सुनुवाई गर्दै सर्वोच्च अदालतले प्रकाण्डलाई ४८ घन्टाभित्र अदालतमा उपस्थित गराउन आदेश दिएको थियो ।सोही बमोजिम अदालतमा उपस्थित गराउन लागिएको हो ।रासस

---

प्रकाशित मिति : ३० साउन २०७५ ।