महोत्तरीमा सडक दुर्घटना ज्यान गुमाउने सङ्ख्या बढ्दो

साझा नेटवर्क , काठमाडौँ  ।
महोत्तरी जिल्लामा गत बर्ष तुलनामा सडक दुर्घटनामा परी ज्यान गुमाउनेको संख्या वर्षेनी बढेको जिल्ला ट्राफिक प्रहरी कार्यालय बर्दिवासले तथ्यांक सार्वजनिक गर्दै सडक दुर्घटनामा मर्नेको संख्या पछिल्ला चार वर्षयता बढ्दै गएको जनाएको छ ।

पछिल्ला चार वर्षको तथ्यांकानुसार २०७४/७५ मा भएका ८७ सडक दुर्घटनामा सर्वाधिक ४४ जनाको मृत्यु भएको छ जसमा १२ वर्षमुनिका ११ बालबालिका,नौ वयष्क महिला र बाँकी २४ वयष्क पुरष छन् ।कार्तिक , फागुन र जेठ महिनामा सबैभन्दा बढी ११/११ सडक दुर्घटना भएका छन् ।

यसअघि २०७१/०७२ मा १९, र २०७२/०७३ मा २४ र २०७३/०७४ मा २९ जनाको सडक दुर्घटनामा परी मृत्यु भएको कार्यालयका प्रमुख तथा प्रहरी निरीक्षक डिल्लीप्रसाद मैनालीले जानकारी दिनुभयो । पछिल्लो आव २०७४/७५ मा त ६६ जना अङ्गभङ्ग नै भएर गम्भीर घाइते भएको कार्यालयले जनाएको छ ।

जिल्ला ट्राफिक प्रहरी कार्यालयले ट्राफिक नियम उल्लंघन गर्नेलाई कारवाही तीव्र बनाए पनि दुर्घटना भने बढ्दै गएको तथ्यांकले देखाएको छ। गत आव २०७४/७५ मा कार्यालयले २४ हजारमाथि कारवाही गरेर रु एक करोड ६० लाख राजश्व संकलन गरेको छ । सो तथ्यांक पनि पछिल्ला तीन आवमा सबैभन्दा बढी हो । यसअघि आव २०७३/७४ मा गरिएका २३ हजार ५३५ कारवाहीबाट रु एक करोड ४६ लाख ५५ हजार राजश्व सङ्कलन भएको थियो ।

त्यसैगरी आव २०७२/७३ मा गरिएका १५ हजार ५२ कारवाहीबाट रु ७६ लाख ६० हजार ९०० राजश्व संकलन भएको कार्यालयले जनाएको छ । वर्षेनी सडक दुर्घटना बढ्दै गएपछि ट्राफिक प्रहरीले सघन रुपमा सचेतना अभियान सञ्चालन गरिएको जनाएको छ । गत आव २०७४/७५ मा १५ विद्यालयमा सञ्चालन गरिएका कक्षामा एक हजार २८० विद्यार्थीलाई ट्राफिक शिक्षा दिइएको थियो ।

त्यसैगरी सुरक्षित चालक बनाउन सर्वसाधारणलाई ट्राफिक शिक्षा दिइएको प्रनि मैनालीले जानकारी दिनुभयो । यसैगरी चार अन्तरक्र्रिया,‘प्रहरी मेरो साथी’ र ‘टोलटोलमा प्रहरी अभियान’ तथा पर्चा र पोष्टरबाट पनि ट्राफिक सचेतनासम्बन्धी अभियान सम्पन्न गरिएको कार्यालयले जनाएको छ । रासस 

---

प्रकाशित मिति :१  साउन २०७५  ।