औधिगिक व्यापार मेलामा ‘पिसिसिआई सिङ्गिङ स्टार’ प्रतियोगिता हुने

कविता घर्ति मगर, पोखरा कार्तिक २६।
आउँदो मंसिरमा आयोजना हुने राष्ट्रिय औधोगिक व्यापार मेलामा ‘पिसिसिआई सिङ्गिङ स्टार’ नामक गायन प्रतियोगिता आयोजना गर्ने भएको छ । पोखरा उद्योग वाणिज्य संघको आयोजनामा मंसिर २३ देखि पुस ४ गतेसम्म पोखराको नयाँ बजारमा हुने राष्ट्रिय औधोगिक व्यापार मेलाको क्रममा आयोजना हुने सो प्रतियोगिता विशुद्ध गायन प्रतियोगिता हुनेछ ।

देशका जुनसुकै ठाउँका प्रतिभावान गायक कलाकारले भाग लिन सक्ने प्रतियोगिताको विजेताले १ लाख नगद र दोस्रो हुनेले ५० हजार रुपैयाँ नगद पुरस्कार र विभिन्न उपहारहरु प्राप्त गर्नेछन् । प्रतियोगितामा वरिष्ठ कलाकार श्यामसुङ तामाङसहितका कलाकारहरुले प्रतियोगीको मूल्याङ्कन गर्नेछन् ।

राष्ट्रिय औद्योगिक व्यापार मेलाको अवसरमा आयोजना हुने साँस्कृतिक कार्यक्रम अन्तर्गत नै ‘पिसिसिआई सिङ्गिङ स्टार’ समेत समावेश गरिएको साँस्कृतिक उपसमिति संयोजक तथा संघका कोषाध्यक्ष पवनकुमार प्रजापतिले जानकारी दिनुभयो । नयाँ कलाकारलाई अवसर प्रदान गर्न तथा मेलामा नयाँपन दिने उदेश्यले यो पटकको मेलामा ‘पिसिसिआई सिङ्गिङ स्टार’ समावेश गरिएको उहाँको भनाई रहेको छ ।

प्रतियोगितामा भाग लिन चाहनेहरुको लागि संघको सचिवालयबाट फाराम बितरण भइरहेको र मंसिर २० गतेसम्म संघको सचिवालय गैह्रापाटनबाट फाराम लिन सकिने उहाँले बताउनुभयो । पोखरा उद्योग वाणिज्य संघको नियमित कार्यक्रम राष्ट्रिय औद्योगिक व्यापार मेलालाई थप मनोरञ्जनात्मक बनाउन मेलामा पहिलो पटक रेस्लिङ पनि समावेश गरिएको उहाँले बताउनुभयो ।

यसैगरी यो पटकको मेलामा राष्ट्रिय स्तरको फेसन सो, ख्यातिप्राप्त कलाकारहरुको सांगीतिक प्रस्तुती, शारिरीक सुगडनको अलावा अन्य मनोरञ्जनात्मक कार्यक्रम पनि समावेश गरिने कोषाध्यक्ष प्रजापतिले जानकारी दिनुभयो ।