विशाल क्षेत्रीको‘आमा तिम्रो दुःख’ले तीजगीत सार्वजनिक, दर्शक श्रोताको मन जित्दै

सज्जन ढकाल गुल्मी २५ साउन ।  जापानमा रहेर नेपाली लोकसंगीतको सिर्जना र प्रवर्द्धनमा सक्रिय गायक तथा सर्जक विशाल क्षेत्रीको नयाँ तीज गीत ‘आमा तिम्रो दुःख’ पछिल्लो समय नेपाली सांगीतिक क्षेत्रमा चर्चाको विषय बनेको छ।

करिब दुई दशकअघिका नेपाली आमाहरूले भोगेका दुःख, संघर्ष, पीडा र त्यागका यथार्थ कथालाई टपक्क टिपेर तयार गरिएको गीतले छोटो समयमै दर्शक–श्रोताको उल्लेखनीय माया बटुलिरहेको छ। विशेषगरी गीतको मार्मिक शब्द, भावनात्मक कथा र जीवन्त प्रस्तुतिका कारण ‘आमा तिम्रो दुःख’ अहिले सामाजिक सञ्जालमा सुपरहिट बन्दै गएको छ।

गीतमा विशाल क्षेत्रीको शब्द तथा संगीत, अन्जिता विश्वकर्माको स्वर र याम थापा मगरको संगीत संयोजन रहेको छ। विशेष सल्लाहकार तथा सहयोगी राजेन्द्र पाण्डेको टिमको सहकार्यमा बजारमा ल्याइएको यो गीतले मौलिक तीज गीतको स्वादसँगै आमाको जीवनसँग जोडिएको गहिरो भाव प्रस्तुत गरेको छ।

गीतको कथा तथा निर्देशन दुर्गा पौडेलले गरेका छन्। भिडियोमा रन्जिता गुरुङ, रश्मि भट्ट तथा बालकलाकार सृष्टि खड्कीको उत्कृष्ट अभिनय रहेको छ। आमाको दुःख, संघर्ष र त्यागलाई दृश्यमा भावनात्मक ढंगले प्रस्तुत गरिएकाले भिडियोले पनि दर्शकको मन जितिरहेको छ।

‘आमा तिम्रो दुःख’ले अहिले TikTok, Facebook र YouTube लगायतका सामाजिक सञ्जालमा राम्रो चर्चा बटुलिरहेको छ। गीतका भिडियो तथा विभिन्न अंशहरू सामाजिक सञ्जालमा शेयर भइरहेका छन् भने दर्शक–श्रोताले गीतको शब्द, संगीत, स्वर तथा कथावस्तुको प्रशंसा गरिरहेका छन्।

आमाको पीडालाई तीज गीतमार्फत उठान पछिल्लो समय तीज गीतहरूमा मनोरञ्जन र नृत्यप्रधान विषयवस्तु बढी देखिने गरे पनि ‘आमा तिम्रो दुःख’ले भने आमाहरूले विगतमा भोगेका वास्तविक दुःख र संघर्षलाई केन्द्रमा राखेको छ।

गीतले तत्कालीन नेपाली समाजमा आमाहरूले घरपरिवार, सन्तान र सामाजिक जिम्मेवारीका लागि गरेको त्यागलाई सम्झाउने प्रयास गरेको छ। यही कारण गीत धेरै आमाहरूको आफ्नै जीवनकथासँग जोडिन पुगेको र दर्शकको भावनालाई छोएको देखिन्छ।

लामो सांगीतिक यात्रामा विशाल क्षेत्रीको अर्को सफलता

नेपाली लोकसंगीतमा लामो समयदेखि सक्रिय विशाल क्षेत्रीका यसअघि पनि दर्जनौँ गीतले दर्शक–श्रोताको माया पाइसकेका छन्। विभिन्न मौलिक लोक तथा तीज गीतमार्फत आफ्नो छुट्टै पहिचान बनाउँदै आएका क्षेत्रीले यसपटक भने आमाको पीडा र त्यागलाई केन्द्रमा राखेर फरक विषयवस्तुको तीज गीत प्रस्तुत गरेका हुन्।

जापानमा रहेर पनि नेपाली भाषा, कला, संस्कृति र लोकसंगीतप्रतिको आफ्नो निरन्तरतालाई कायम राख्दै आएका क्षेत्रीका लागि ‘आमा तिम्रो दुःख’ पछिल्लो सांगीतिक यात्राको महत्वपूर्ण उपलब्धिका रूपमा देखिएको छ।गीत सार्वजनिक भएपछि प्राप्त भइरहेको दर्शक–श्रोताको प्रतिक्रिया र सामाजिक सञ्जालमा बढिरहेको चर्चाले ‘आमा तिम्रो दुःख’ यस वर्षको चर्चित तीज गीतमध्ये एक बन्ने संकेत देखाएको छ।