अदालतको ताकेता हुँदाहुँदै फरार अभियुक्त अरुण कुशवाहा पक्राउ परेनन्

वीरगंज २३ असार । बारा जिल्लाको कलैया उपमहानरपालिका वडा नं. २३ निवासी धर्मराज महतोको छोरा अरुण कुशवाहा सम्मानित पर्सा जिल्ला अदालतको फरार सुचिमा रहेका छन् ।

जिल्ला पर्सा बिन्दवासिनी गाउँपालिका वडा नं. ३ घर भई वीरगंज महानगरपालिका वडा नं. १० अशोकवाटिका बस्ने सुवाश प्रसाद चौरसियाको जाहेरीले नेपाल सरकार वादी रहेको ज्यान मार्ने उद्योग मुद्दामा कुशवाहा फरार अभियुक्तको सुचिमा रहे पनि पर्सा प्रहरीले हालसम्म पक्राउ गर्न नसक्दा उनी गाउँघरमा अझ आतंक नै मच्चाई राखेको स्थानयहरु बताउँछन् ।

मलखादको कारोबार गर्ने विवादित व्यवसायीको रुपमा चिनिने अरुण कुशवाहा सहितका समुहले मिति २०८१-१-३१ गतेका दिन बिहान करिब ८ बजेको समयमा वीरगंज महानगरपालिका वडा नं. ११ रानीघाट स्थित पुलदेखि दक्षिणतर्फ जाने बाटोमा सुवाश प्रसाद चौरसियालाई घेराहाली शरिरको विभिन्न भागमा हात मुक्काले आक्रमण गर्दै धारिलो हतियारले घाँटीमा ताकी प्रहार गरेका थिए ।

मुद्दा नं. ०८२–c१–०२१८ रहेको ज्यान मार्ने उद्योग मुद्दामा सम्मानित अदालतले प्रहरीलाई पटक–पटक पक्राउ गर्न ताकेता गरे पनि हालसम्म अरुण कुशवाहा पक्राउ पर्न नसकेकोमा प्रहरीको भुमिका माथि शंका पैदा भएको पिडित जाहेरवाला सुवाश प्रसाद चौरसियाको आरोप रहेको छ ।

कलैया उपमहानगरपालिका वडा नं. २३ स्थित सञ्चालनमा रहेको श्री कुश कृषि सहकारी संस्थाले नेपाल सरकारबाट कृषकहरुलाई सहुलियत दरमा बिक्रीको लागि अनुदानमा खरिद गरी ल्याएको मलखादहरु बढी मुनाफा लिई कालोबजारी गरेको आरोपमा अरुण कुशवाहालाई बारा प्रहरीले २०७९ साल भदौको १३ गतेका दिन पक्राउ गरी हिरासतमा राखेको थियो ।

महागढीमाई नगरपालिका वडा नं. २ बस्ने गगनदेव प्रसाद कुशवाहाको उजुरीको आधारमा प्रहरीले पक्राउ गरेको थियो । उजुरी पर्नसाथ जिल्ला प्रहरी कार्यालय बाराबाट खटिएको टोलीले कुशवाहाको गोदामबाट ११८ बोरा डिएपी मल, २९ बोरा युरिया, ६१ बोरा पोटास, खेती शक्ति लेखिएको फस्फेट १ बोरा लगायतका सामानहरु बरामद गरी पहिलो पटक १० दिनको म्याद थमाई थप अनुसन्धान अगाडि बढाएको थियो ।