सहनी ब्रदर्श एण्ड सप्लायर्सद्धारा लाखौको कर छली, पर्सा बाराका प्रायः पालिकाहरूमा कमिसनको जगजगी

 वीरगन्ज १५ असोज। वीरगन्ज महानगरपालिकाको मेनरोड भारतीय महावाणिज्य दूतावासको पुर्वपट्टी स्थित सहनी ब्रदर्श एण्ड सप्लायर्सद्धारा लाखौं लाखको कर छली भइरहेको छ भने पर्सा, बाराका प्रायः पालिकाहरूमा सहनी ब्रदर्शद्धारा कमिसनको जगजगी बढेको समाचार स्रोतले जनाएको छ ।

सहनी ब्रदर्शका सञ्चालक संदिप सहनीले प्रायः पर्सा, बाराका स्थानीय तहहरूमा जिन्सीका सामानहरू सप्लाइ गर्ने र कार्यालय प्रमुख तथा लेखापाललाई मोटो कमिसन दिने गरेको स्रोतको भनाई रहेको छ । कतिपय स्थानीय तहहरूमा सञ्चालक सहनिले भ्याट सहितको बिल मात्र उपलब्ध गराउने र आफु २० प्रतिशत राखी बाकी रकम प्रमुख र लेखापाललाई बुझाउने गरेको बताइन्छ ।

 पर्सा, बाराका स्थानीय तहहरुका अधिकांश भ्रष्टाचारी कर्मचारीहरूले सहनी ब्रदर्श एण्ड सप्लायर्स सँग कारोबार गर्ने गरेको बताइन्छ । सहनी ब्रदर्शका सञ्चालक सहनिले आफ्ना र आफ्ना केही नातेदार तथा आसेपासेहरूको नाममा करिब एक दर्जन फर्महरू दर्ता गराई स्थानीय तहहरूमा जिन्सीका सामानहरू सप्लाइ गर्दै आएको स्थानीय तहका एक कर्मचारीले नाम नछाप्ने शर्तमा यस अनलाइनलाई बताए ।

 कुनै पनि पालिकाले एउटा फर्म सँग वार्षिक १० लाख सम्मको मात्र कारोबार गर्ने बाध्यात्मक नियम रहेको कारण सहनीले बढी भन्दा बढी फर्महरु राखेको ती कर्मचारीको भनाई रहेको छ । सहनी सँग रहेका फर्महरूले वार्षिक रुपमा करिब ५० करोडको सामानहरू सप्लाइ गर्ने गरेको बताइन्छ । भारतबाट तस्करी गरेर मगाइएका सामानहरूलाई सहनीले आफ्नो फर्महरूको स्थानीय तहहरूमा बिल बिजक दिने गरेको बताइन्छ ।

सहनीले आर्थिक वर्ष २०७९-०८० र २०८०-०८१ मा सबै भन्दा बढी कारोबार पर्साको ठोरी, जिराभवानी, जगरनाथपुर, धोबीनी, कालिकमाई, पकहाँ मैनपुर र बाराको विश्रामपुर, प्रसौनी, फेटा, बारागढी, जितपुर सिमरा लगायतका दर्जनौं स्थानीय तहहरूको भ्रष्ट कर्मचारीहरू सँग साँठगाँठ गरी कारोबार गर्ने गरेको ती स्रोतको दाबी रहेको छ ।

स्थानीय तहका अधिकांश भ्रष्ट प्रमुख प्रशासकीय अधिकृत, लेखापाल र जिन्सी प्रमुखहरूले सहनी सँग मिलोमतो गरी अनियमितता गर्ने गरेको बताइन्छ । सहनी ब्रदर्शले मासिक लाखौं लाख कर छल्दै कारोबार गर्दै आइरहेकोमा आन्तरिक राजस्व कार्यालय पर्सा, राजस्व अनुसन्धान कार्यालय पथलैया लगायतका नियमनकारी निकायले सहनी सँग खरिद खाता र वर्ष भरीमा भए गरेका सप्लाईको बिल बिजक नियन्त्रणमा लिएर अनुसन्धान थाल्यो भने उनी नेपाल सरकारको कतिको राजस्व छलिरहेका छन् घाम जस्तै छर्लङ्ग हुने स्रोतको भनाई रहेको छ ।