गुल्मीको खाम्सेपानी रातडाँडा सडकमा १० करोड पर्यो

प्रेम सुनार गुल्मी जेठ ७।
गुल्मीको साविकको अर्खले गाविस देखि हस्तीचौरको रातडाँडा जोडने सडक विस्तारका लागि आज अर्थ मन्त्रालयबाट १० करोड रुपैयाँ स्वीकृत भएको जनाईएको छ । खाम्सेपानी भुवनपानी तल्लाखर्क रातडाँडा सडकका लागि आज अर्थ मन्त्रालयबाट १० करोड रुपैयाँ स्वीकृत भएको नेपाली कांग्रेस गुल्मीका जिल्ला सचिव खिलध्वज पन्थीले जानकारी दिए ।

‘वहुवर्षिय योजनामा पार्नका लागि ९ महिना अघि देखि अर्थ मन्त्रालयमा कागज पेश गरिए पनि सो मन्त्रालयले अनाकानी गरेको थियो’–सचिव पन्थीले भने–‘आज गुल्मी क्षेत्र नम्वर २ का सांसद चन्द्र भण्डारीको पहलमा वहुवर्षिय योजनामा पार्न सफल भईएको छ ।’

उनले खाम्सेपानी देखि रातडाँडा सम्मको १० किलो मिटर सडक दुई वर्ष भित्रमा कालोपत्रे समेत हुने बताए । गत वर्ष ५० लाख पारेर काम सुरु गरिएको उक्त सडकले अर्खलेवासीलाई उत्तर र पश्चिमको यात्रा गर्न सुविधा हुने भएको छ ।