यो बर्षनै दुई लाख युवालाई न्यूनतम रोजगार दिन्छौ : मन्त्री बिष्ट

टोपलाल अर्याल, गुल्मी असार ११ ।
नेपाल सरकारका श्रम, रोजगार तथा सामाजिक सुरक्षा मन्त्री गोकर्णराज विष्टले यो बर्ष देशका दुई लाख युवालाई न्यूनतम रोजगार दिने बताएका छन् । गुल्मीको धुर्कोट गाउँपालिकाको शहिद पार्ककाको शिलन्यास गर्दै मन्त्री विष्टले यस्तो बताएका हुन् । पछिल्लो समय श्रम र रोजगारको क्षेत्रमा ठूलो चुनौतिका बिच पनि महत्पूर्ण योजना र निर्णयहरु भएकाले केहि समयमै पूर्ण कार्यान्वयन गरिने जानकारी दिए ।
साथै उनले स्वदेशमा रोजगारको पूर्ण ग्यारेन्टी नहुँदासम्म विदेशमा कामदारहरुलाई ढुक्क र सुरक्षित भएर काम गर्ने ब्यवस्था समेत मिलाउने प्रयास भइरहेको बताए । ‘अझै पनि गाउँ र घरको मायालाई पैतलामुनि राखेर कैँयौ युवा परदेशमा श्रम बेचिरहेका छन्’, मन्त्री विष्टले भने, ‘पाचँ बर्षभत्र बाध्यताले विदेश जानुपर्ने अवस्थाको अन्त्य गर्छौ ।’

प्रधानमन्त्रीको भारत र चिन भ्रमण विकासका लागि

मन्त्री बिष्टले दुई छिमेकीबिचको सम्बन्धलाई जोगाएर प्रधानमन्त्री केपी ओलीले भारत र चिन भ्रमण गरेकाले थुप्रै विकासको मार्ग खुला भएको बताए । बहुमत सहितको कम्युनिष्ट सरकार प्रति नागरिकको आशा र भरोसा रहेकाले कुनै दिन पछुतो हुन नदिने बताए । ‘व्यक्तिगत स्वार्थमा देशलाई धेरैले धेरै पटक डुवाएका, त्यसैले जनताले परिवर्तनको अनुभुति समयमै गर्न पाएनन,’उनले भने,‘विकास र समृद्धि मार्फत २१ औ शताब्दीको महसुस गर्न धेरै समय लाग्दैन ।’

धुर्कोटमा नमुना सहिद पार्कको शिलन्यास

गुल्मी क्षेत्र नम्बर २ का सासंद समेत रहेका मन्त्री विष्टले धुर्कोट गाउँपालिकाले यसै बर्षदेखि निर्माण थालेको गौरवको आयोजना ‘शहिद स्मृति पार्क’ को शिलन्यास गरेका छन् । पार्कको शिलन्यास गर्दै उनले पार्कको निर्माणसँगै यस क्षेत्रको पर्यटन विकास हुने भएकाले आर्थिक समृद्धिको ढोका खुल्ने बताए । उनले स्थानिय तहले गर्ने नमुना कार्यमा आफ्नो सधै सहयोग र साथ रहने प्रतिबद्धता ब्यक्त गरे । धुर्कोट गाउँपालिकाले यो बर्ष गाउँपालिकाभित्रका चारवटा सहिदको नाममा महत्वपूर्ण योजना अगाडी सारेको छ । सहिद पार्कमा चारैजना सहिदहरुको शालिक निर्माण गरिने गाँउपालिकाका उपाध्यक्ष शिव बहादुर केसीले बताए । यो सँगै गाउँपालिकाले अर्का सहिद खिमविक्रम नेपाली, विष्णु बस्नेत र जेदुराम भण्डारीको स्मृतिमा सडक तथा भवनहरु निर्माण गरिने केशीले बताए ।

नमुना गाउँपालिकाका बनाउँछौ : गाउँपालिका प्रमुख

धुर्कोट गाउँपालिकाका प्रमुख भुपाल पोखरेलले पाँच बर्षमा नमुना गाउँपालिका बनाउने बताए । उनले शहिद पार्क, धुर्कोट संग्राहालय, पिपलधारा खेल मैदान, जैसीथोक गोपेलाई नमुना बस्ती, एक टोल एक पोखरी, उत्पादनमा आधारित अनुदान, खरका छाना मुक्त गाउँपालिका, एक घर एक धारा, कृषक परिचय पत्र, पशुलाई सुत्केरी भत्ता लगायतका महत्वपूर्ण कार्यक्रम मार्फत धुर्को गाउँपालिकालाई आत्मनिर्भर र आर्थिक समृद्धि सहितको नमुना गाउँपालिका बनाउने पोखरेलले बताए । सोमबार मन्त्री बिष्टले धुर्कोट गाउँपालिकाका जनप्रतिनिधी र कर्मचारीसंग पनि भेटघाट गरेका छन् ।

---

प्रकाशित मिति : ११ असार २०७५ ।