बजेट विनियोजन सम्बन्धि स्थानिय तहका पदाधिकारीलाई तालिम

हुमाकान्त पोखरेल, गुल्मी जेठ १४।
गुल्मी जिल्ला समन्यव समिति गुल्मीले जिल्लाका सबै स्थानिय तहका प्रमुख, उपप्रमुख, प्रमुख प्रशासकिय अधिकृत तथा लेखापालहरुलाई क्षमता अभिवृद्धिसम्बन्धि तालिम प्रदान गरेको छ ।

बजेट विनियोजनको समयमा स्थानिय तहलाई सहज पुग्ने उदेश्यले गाउँपालिका/नगरपालिकाका सम्बन्धित पदाधिकारीहरुलाई प्रशिक्षण दिएको हो । समितिले आइतबार धुर्कोट, मदाने, मालिका र इश्मा गाउँपालिकाका पदाधिकारीहरुलाई मालिका गाउँपालिका ८ सिमलटारीमा प्रशिक्षण दिएको छ ।

प्रत्येक स्थानिय तहलाई दुई/दुई दिनको तालिम प्रदान गरिएको छ । स्थानिय विकास अधिकारी कल्पना श्रेष्ठ, कोष तथा लेखा नियन्त्रक प्रमख शशिन्द्र खाती, जिल्ला समन्वय समितिका कार्यक्रम अधिकृत शंकर प्रसाद गौतम लगायतले प्रशिक्षण दिएको धुर्कोट गाउँपालिका प्रवक्ता कविता विकले जानकारी दिइन् ।

समन्वय समितिले रेसुङ्गा नगरपालिका र गुल्मीदरबार, छत्रकोट र रुरु गाउँपालिका, कालिगण्डगी र सत्यवती गाउँपालिका, चन्द्रकोट गाउँपालिका र मुसिकोट नगरपालिकालाई भने यसभन्दा अगाडी नै क्षमता अभिबृद्धिसम्बन्धि तालिम प्रदान गरिएको छ । प्रशिक्षणमा योजना छनोटको तरिका , बजेट विनियोजन लगायतका विषयमा जानकारी गराइएको थियो ।

त्यस्तै बजेट विनियोजन गर्दा स्थानिय तहले आर्थिक, सामाजिक, संस्थागत विकास लगायत विकासका पूर्वाधारलाई केन्द्रमा राखेर बजेट विनियोजन गर्नुपर्नेमा प्रशिक्षणकर्ताले जोड दिएका थिए । समन्वय समितिले अब छिट्टै दोस्रो चरणमा एकिकृत सम्पत्ति कर सम्बन्धि पनि तालिम दिन लागेको जनाएको छ ।

नेपालमै पहिलो पटक एकिकृत सम्पत्ति करसम्बन्धि क्षमता अभिवृद्धि सम्बन्धि प्रशिक्षण दिन लागिएको समन्वय समिति प्रमुख लक्षमण पराजुलीले बताए ।

---

प्रकाशित मिति : १४ जेठ २०७५ ।